മുഹമ്മ സെന്റ് ജോർജ് ഫെറോനയിൽ വിശുദ്ധ ജോൺ മറിയ വിയാനിയുടെ തിരുനാൾ ഭക്തിനിർഭരമായി ആഘോഷിച്ചു
മുഹമ്മ: വൈദികരുടെ മധ്യസ്ഥനും വിശുദ്ധ പൗരോഹിത്യത്തിന്റെ മാതൃകയുമായ വിശുദ്ധ ജോൺ മറിയ വിയാനിയുടെ തിരുനാൾ ആലപ്പുഴ മുഹമ്മ സെന്റ് ജോർജ് ദൈവാലയം ഫെറോനയിൽ ഭക്തിസാന്ദ്രമായ ചടങ്ങുകളോടെ ആഘോഷിച്ചു.
തിരുനാളിനോടനുബന്ധിച്ച് നടന്ന പ്രത്യേക സമ്മേളനത്തിൽ മുഹമ്മ സെന്റ് ജോർജ് ദൈവാലയം ഫെറോന വികാരി റവ. ഫാ. ആന്റണി കാട്ടുപാറയെ ആദരിച്ചു. ചങ്ങനാശ്ശേരി അതിരൂപതയുടെ കമ്മ്യൂണിറ്റി അവെയർനെസ് ആൻഡ് റൈറ്റ് പ്രൊട്ടക്ഷൻ കോർഡിനേറ്റർ ബേബി വട്ടക്കര ആദരവ് നിർവഹിച്ചു.
മണ്ണുമടത്തിൽ അപ്പച്ചൻ അധ്യക്ഷത വഹിച്ച ചടങ്ങിൽ ജോസ് കുട്ടാരത്തിൽചിറ, ജോളി പുതുപ്പറമ്പ്, മിനി ജേക്കബ് എന്നിവർ വിശുദ്ധ ജോൺ മറിയ വിയാനിയുടെ ആത്മീയ ജീവിതവും വൈദിക സേവനത്തിന്റെ മഹത്വവും അനുസ്മരിച്ച് സംസാരിച്ചു.
തുടർന്ന് വിശ്വാസികൾ ഒരുമിച്ച് കേക്ക് മുറിച്ച് വിതരണം ചെയ്ത് തിരുനാളിന്റെ സന്തോഷം പങ്കുവെച്ചു. ഇടവകാംഗങ്ങളുടെയും വിശ്വാസികളുടെയും സജീവ പങ്കാളിത്തം ചടങ്ങുകൾക്ക് കൂടുതൽ ഭക്തിനിർഭരവും ഹൃദയസ്പർശിയുമായ അന്തരീക്ഷം സമ്മാനിച്ചു.
വൈദികരുടെ മധ്യസ്ഥനായ വിശുദ്ധ ജോൺ മറിയ വിയാനിയുടെ തിരുനാൾ ആഘോഷം, പ്രാർത്ഥനയുടെയും സ്നേഹത്തിന്റെയും ഐക്യത്തിന്റെയും സന്ദേശം പങ്കുവെച്ച ആത്മീയ സംഗമമായി മാറി.
