“മോൻ ഒന്ന് വിളിക്കുമല്ലോ…” കാത്തിരിപ്പിനൊടുവിൽ ദുബായിൽ നിന്ന് എത്തിയത് മരണവാർത്ത; 26-ാം വയസ്സിൽ പൊലിഞ്ഞ ഷിൻദാസിന്റെ പ്രവാസസ്വപ്നം
മണ്ണഞ്ചേരി: മകന്റെ ഒരു ഫോൺവിളിക്കായി പ്രതീക്ഷയോടെ കാത്തിരുന്ന ഒരു വീട്… ഓരോ തവണ ഫോൺ ശബ്ദിക്കുമ്പോഴും “ഷിൻദാസ് ആയിരിക്കുമോ?” എന്ന പ്രതീക്ഷ. എന്നാൽ ദിവസങ്ങൾ കഴിഞ്ഞിട്ടും ആ വിളി വന്നില്ല. ഒടുവിൽ ആ കുടുംബത്തെ തേടിയെത്തിയത് സഹിക്കാനാവാത്ത മരണവാർത്തയായിരുന്നു. 
മണ്ണഞ്ചേരി പഞ്ചായത്ത് രണ്ടാം വാർഡ് പാപ്പാളി പനയിൽ ജങ്ഷന് സമീപം വലിയ വീട്ടിൽ ശിവദാസിന്റെ മകൻ ഷിൻദാസിനെ (26) ദുബായിൽ മരിച്ച നിലയിൽ കണ്ടെത്തിയതായി ബന്ധുക്കൾക്ക് വിവരം ലഭിച്ചു. മൃതദേഹം ദുബായ് പൊലീസിന്റെ മോർച്ചറിയിൽ സൂക്ഷിച്ചിരിക്കുകയാണ്.
കുടുംബത്തിന്റെ നല്ല നാളുകൾ സ്വപ്നം കണ്ടാണ് ആറുമാസം മുൻപ് ഷിൻദാസ് ജോലി തേടി ദുബായിലേക്ക് പോയത്. എന്നാൽ കഴിഞ്ഞ ഏതാനും ദിവസങ്ങളായി ഷിൻദാസിനെ ഫോണിൽ ബന്ധപ്പെടാൻ കഴിഞ്ഞിരുന്നില്ല.
വിളിച്ചിട്ടും കിട്ടാതായ ഓരോ നിമിഷവും വീട്ടുകാരുടെ ആശങ്ക വർധിച്ചു. എന്താണ് സംഭവിച്ചതെന്നറിയാതെ ബന്ധുക്കൾ പല വഴികളിലൂടെയും വിവരം തേടി. ഒടുവിൽ ബന്ധു തിരുവനന്തപുരത്തെ ദുബായ് എംബസിയിൽ രേഖാമൂലം പരാതി നൽകുകയും ചെയ്തു.
അപ്പോഴും കുടുംബത്തിന്റെ മനസ്സിൽ ഒരു പ്രതീക്ഷയുണ്ടായിരുന്നു — “എവിടെയെങ്കിലും സുരക്ഷിതനായിരിക്കട്ടെ… ഉടൻ വിളിക്കുമായിരിക്കും…”
പക്ഷേ ആ പ്രതീക്ഷ അധികനാൾ നീണ്ടില്ല.
തിങ്കളാഴ്ച ഉച്ചയോടെ ദുബായിൽ ജോലി ചെയ്യുന്ന കായംകുളം സ്വദേശിയായ യുവാവാണ് ഷിൻദാസിന്റെ മൃതദേഹം ദുബായ് പൊലീസിന്റെ മോർച്ചറിയിലുണ്ടെന്ന വിവരം ബന്ധുക്കളെ അറിയിച്ചത്.
മകന്റെ ശബ്ദം വീണ്ടും കേൾക്കുമെന്ന പ്രതീക്ഷയിൽ കാത്തിരുന്ന അച്ഛന് മുന്നിലേക്ക് എത്തിയത് മകന്റെ മരണവാർത്ത… കുടുംബത്തിന് താങ്ങാനാവാത്ത ആഘാതമായി അത് മാറി.
ഷിൻദാസിന്റെ അമ്മ മധുബാല നേരത്തെ മരണപ്പെട്ടിരുന്നു. ഓട്ടോറിക്ഷ ഓടിച്ച് കുടുംബം പുലർത്തുന്ന പിതാവ് ശിവദാസിന് ഇപ്പോൾ മകന്റെ അപ്രതീക്ഷിത വിയോഗത്തിന്റെ വേദന കൂടി. ബി.എസ്.എഫിൽ ജോലി ചെയ്യുന്ന ഷിംദാസ് ഏക സഹോദരനാണ്.
ജീവിതം പടുത്തുയർത്താൻ കടൽ കടന്നുപോയ മകൻ ഇനി ജീവനോടെ നാട്ടിലേക്ക് മടങ്ങിവരില്ലെന്ന യാഥാർഥ്യത്തിന് മുന്നിൽ വിങ്ങുകയാണ് കുടുംബം.
ആറുമാസം മുൻപ് ഒരുപാട് പ്രതീക്ഷകളുമായി യാത്ര പറഞ്ഞിറങ്ങിയ 26കാരൻ… ഇന്ന് ആയിരക്കണക്കിന് കിലോമീറ്റർ അകലെ ഒരു പൊലീസ് മോർച്ചറിയിൽ. നാട്ടിലേക്ക് അവനെ കാത്തിരിക്കുന്ന കുടുംബത്തിന് ഇനി ബാക്കിയാകുന്നത് ഓർമകൾ മാത്രം.
മരണത്തിലേക്ക് നയിച്ച സാഹചര്യം സംബന്ധിച്ച വ്യക്തമായ വിവരങ്ങൾ ഇനിയും ലഭ്യമായിട്ടില്ല. മൃതദേഹം നാട്ടിലെത്തിക്കുന്നതിനുള്ള തുടർനടപടികൾ നടക്കേണ്ടതുണ്ട്.
ഷിൻദാസിന്റെ അപ്രതീക്ഷിത വിയോഗത്തിൽ കുടുംബത്തിന്റെ ദുഃഖത്തിൽ പങ്കുചേരുന്നു… ആദരാഞ്ജലികൾ.
