അരനൂറ്റാണ്ടിന്റെ അക്ഷരവെളിച്ചം; മുഹമ്മ കാവുങ്കൽ യുവശക്തി ഗ്രന്ഥശാല സുവർണ ജൂബിലി നിറവിൽ
മുഹമ്മ: ഒരു നാടിന്റെ വായനയെയും സാംസ്കാരിക ജീവിതത്തെയും തലമുറകളോളം ചേർത്തുപിടിച്ച കാവുങ്കൽ യുവശക്തി ഗ്രന്ഥശാല ആൻഡ് വായനശാലയ്ക്ക് അമ്പതിന്റെ നിറവ്. മുഹമ്മയുടെ സാംസ്കാരിക രംഗത്ത് അരനൂറ്റാണ്ട് പിന്നിടുന്ന ഗ്രന്ഥശാലയുടെ ഒരു വർഷം നീളുന്ന സുവർണ ജൂബിലി ആഘോഷങ്ങൾക്ക് പ്രൗഢമായ തുടക്കമായി.
പി. പ്രസാദ് എംഎൽഎ സുവർണ ജൂബിലി ആഘോഷങ്ങൾ ഉദ്ഘാടനം ചെയ്തു. ശാസ്ത്രജ്ഞൻ ഡോ. എം.ആർ. രാമദാസ് പിള്ള മണക്കാട്ടംപള്ളിൽ സുവർണ ജൂബിലി ദീപം തെളിച്ചു. ഗ്രന്ഥശാല പ്രസിഡന്റ് എൻ. അനിൽകുമാർ നീലാംബരി അധ്യക്ഷത വഹിച്ചു.
🎭 ഒരു വർഷം മുഹമ്മയിൽ കലയും സാഹിത്യവും കായികവും
സുവർണ ജൂബിലിയുടെ ഭാഗമായി ഒരു വർഷം നീളുന്ന വിപുലമായ പരിപാടികളാണ് യുവശക്തി ഒരുക്കുന്നത്. സാംസ്കാരിക സംവാദങ്ങൾ, കവിയരങ്ങ്, നാടകങ്ങൾ, കഥാപ്രസംഗം, ചരിത്ര സെമിനാറുകൾ, മെഡിക്കൽ ക്യാമ്പുകൾ, ലഹരിവിരുദ്ധ ബോധവൽക്കരണം, ചിത്രരചന, ചെറുകഥ–ഉപന്യാസ മത്സരങ്ങൾ, ഫ്യൂഷൻ തിരുവാതിര തുടങ്ങിയവ നടക്കും.
ഇതിനൊപ്പം ചെസ്, കാരംസ്, കൗണ്ടി ക്രിക്കറ്റ്, പ്രസംഗ മത്സരം ഉൾപ്പെടെയുള്ള വിവിധ മത്സരങ്ങളും സുവർണ ജൂബിലിയുടെ ഭാഗമായി സംഘടിപ്പിക്കും.
മുഹമ്മ പഞ്ചായത്ത് പ്രസിഡന്റ് അരുൺ മോഹൻ മുഖ്യപ്രഭാഷണം നടത്തി. കാവുങ്കൽ ദേവീക്ഷേത്രം മേൽശാന്തി സുരേഷ് നമ്പൂതിരി സമ്മാനദാനം നിർവഹിച്ചു.
വാർഡ് അംഗങ്ങളായ ടി.കെ. മോഹൻദാസ്, സി.ജെ. നീതു, സുവർണ ജൂബിലി കമ്മിറ്റി ചെയർമാൻ പി.എസ്. സന്തോഷ്കുമാർ, ഗ്രന്ഥശാല സെക്രട്ടറി കെ.ആർ. വേദാനന്ദൻ, എൻ. രാമനാഥൻ, സജി ടി. തകിടിയിൽ എന്നിവർ സംസാരിച്ചു.
അരനൂറ്റാണ്ടായി പുസ്തകങ്ങളിലൂടെയും കലാ–സാംസ്കാരിക പ്രവർത്തനങ്ങളിലൂടെയും മുഹമ്മയുടെ പൊതുജീവിതത്തിന്റെ ഭാഗമായ യുവശക്തിയുടെ സുവർണ ജൂബിലി, ഒരു സ്ഥാപനത്തിന്റെ വാർഷികാഘോഷം മാത്രമല്ല; മുഹമ്മയുടെ വായനാ–സാംസ്കാരിക പാരമ്പര്യത്തിന്റെ ആഘോഷം കൂടിയായി മാറുകയാണ്.
