തെരുവുനായ്ക്കളുടെ ഭീതിയിൽ മണ്ണഞ്ചേരി ജംക്ഷൻ 🐕
ഒരുകാലത്ത് യാത്രക്കാരുടെ തിരക്കുകളും കുട്ടികളുടെ ചിരികളും നിറഞ്ഞിരുന്ന മണ്ണഞ്ചേരി ജംക്ഷൻ ഇന്ന് ഭീതിയുടെ മറ്റൊരു മുഖമാണ് കാണിക്കുന്നത്. ബസ് കാത്തുനിൽക്കുന്ന യാത്രക്കാരെ പോലും കൂട്ടമായി എത്തുന്ന തെരുവുനായ്ക്കൾ ആക്രമിക്കാൻ ശ്രമിക്കുന്നതോടെ പ്രദേശവാസികൾ കടുത്ത ആശങ്കയിലാണ്.
മണ്ണഞ്ചേരി ജംക്ഷന്റെ വടക്കുഭാഗത്തുള്ള സ്വകാര്യ ബസ് സ്റ്റാൻഡിന് സമീപം തെരുവുനായ്ക്കളുടെ സ്ഥിരം താവളമാണ് രൂപപ്പെട്ടിരിക്കുന്നത്. ഇന്നലെ രാവിലെ ബസ് കാത്തുനിന്ന യാത്രക്കാർക്ക് നേരെ കൂട്ടമായെത്തിയ നായ്ക്കൾ ചാടിയടുക്കാൻ ശ്രമിച്ചതോടെ കുടയും ബാഗും ഉപയോഗിച്ച് അവയെ തുരത്തിയാണ് പലരും രക്ഷപ്പെട്ടത്.
ഇരുചക്ര വാഹനങ്ങൾക്ക് പിന്നാലെ ഓടിയും വാഹനങ്ങൾക്ക് കുറുകെ ചാടിയും നായ്ക്കൾ അപകടഭീഷണി സൃഷ്ടിക്കുന്നതായും നാട്ടുകാർ പറയുന്നു. വീടുകളിലെ വളർത്തുമൃഗങ്ങൾക്കും ആക്രമണഭീഷണി വർധിച്ചിരിക്കുകയാണ്.
ഏറ്റവും ആശങ്കാജനകമായത്, സ്കൂളിലേക്കും മദ്രസയിലേക്കും പോകുന്ന വിദ്യാർത്ഥികളുടെ സുരക്ഷയാണ്. ഓരോ രാവിലെയും ഭയത്തോടെയാണ് കുട്ടികൾ ഈ വഴിയിലൂടെ യാത്ര ചെയ്യുന്നത്. കഴിഞ്ഞ ദിവസം പൊന്നാട് അയ്യാട്ടുപറമ്പ് ഭാഗത്ത് കൂട്ടമായി ആക്രമിച്ച നായ്ക്കളെ ഭയന്ന് സൈക്കിളിൽ നിന്ന് വീണ് ഒരു വിദ്യാർത്ഥിക്ക് പരിക്കേറ്റ സംഭവവും പ്രദേശവാസികളുടെ ആശങ്ക ഇരട്ടിപ്പിച്ചു.
കോടതിയും സർക്കാരും അക്രമകാരികളായ തെരുവുനായ്ക്കളെ നിയന്ത്രിക്കാൻ നിർദേശങ്ങൾ നൽകിയിട്ടും പ്രാദേശിക തലത്തിൽ ഫലപ്രദമായ നടപടി ഉണ്ടാകുന്നില്ലെന്നതാണ് നാട്ടുകാരുടെ പരാതി. ജനപ്രതിനിധികൾക്കും ബന്ധപ്പെട്ട അധികാരികൾക്കും പരാതി നൽകാനുള്ള തയ്യാറെടുപ്പിലാണ് പ്രദേശവാസികൾ.
⚠️മണ്ണഞ്ചേരിയുടെ ജനങ്ങളുടെ സുരക്ഷ ഇനി വൈകിക്കൂടാ.
യാത്രക്കാരുടെയും വിദ്യാർത്ഥികളുടെയും ജീവന് ഭീഷണിയായ തെരുവുനായ ശല്യത്തിന് അടിയന്തര പരിഹാരം കാണണമെന്നാണ് മുഹമ്മയുടെ പൊതുവായ ആവശ്യം.
