വേമ്പനാട്ടുകായലിൽ മീനുകൾ ചത്തുപൊങ്ങുന്നു

22 April 2026
മുഹമ്മ വേമ്പനാട്ടുകായലിലെ തീരപ്രദേശങ്ങളിൽ കൂട്ടത്തോടെ മീനുകൾ ചത്തുപൊങ്ങുന്നു. പടിഞ്ഞാറൻ തീരപ്രദേശങ്ങളിലാണിത്. വരാൽ, കരിമീൻ, പള്ളത്തി തുടങ്ങിയ മീനുകളാണ് ചത്തത്. കാരണം വ്യക്തമല്ല.
കഴിഞ്ഞദിവസം തണ്ണീർമുക്കം ബണ്ടിന്റെ ചില ഷട്ടറുകൾ തുറന്നിരുന്നു. കായലിലെ കെട്ടിക്കിടന്ന മലിനജലം ശുചീകരിക്കാൻ തെറ്റായ രീതികൾ സ്വീകരിക്കുന്നവരുണ്ട്. അപകടകരമായ രാസപദാർഥങ്ങൾ ഇതിലുണ്ടാകാം. രാത്രി ചിലർ മത്സ്യബന്ധനത്തിനായി കായലിൽ നഞ്ചു കലർത്താറുണ്ടെന്നും മത്സ്യത്തൊഴിലാളികൾ പറയുന്നു. വെള്ളം ശരിയാംവണ്ണം പരിശോധിച്ച് റിപ്പോർട്ടു നൽകി അതിനു പ്രതിവിധി ഉണ്ടാക്കണമെന്നാണ് മത്സ്യത്തൊഴിലാളികളുടെ ആവശ്യം.
കഴിഞ്ഞവർഷം രണ്ടുതവണ സമാനസാഹചര്യത്തിൽ മീനുകൾ
ചത്തുപൊങ്ങിയിരുന്നു. മലിനീകരണ നിയന്ത്രണ ബോർഡ് സാംപിളെടുത്ത് പരിശോധിച്ചിരുന്നു. ഓക്സിജൻ കുറഞ്ഞതാകാം കാരണമെന്നാണ് അന്നു പറഞ്ഞിരുന്നത്.

കഴിഞ്ഞവർഷം രണ്ടുതവണ സമാനസാഹചര്യത്തിൽ മീനുകൾ ചത്തുപൊങ്ങിയിരുന്നു