പാതിരാമണലിന് സമീപം കായലിൽ മൃതദേഹം കണ്ടെത്തി; കാണാതായ കക്കവാരൽ തൊഴിലാളി ബാബുവിന് ദാരുണാന്ത്യം

ആലപ്പുഴ: ഒരു ദിവസത്തിലേറെ നീണ്ട ആശങ്കകൾക്ക് ഒടുവിൽ ദുഃഖവാർത്ത. ആലപ്പുഴ വിളക്കുമരം ജെട്ടിക്ക് സമീപം കാണാതായ കക്കവാരൽ തൊഴിലാളിയുടെ മൃതദേഹം പാതിരാമണൽ ദ്വീപിന് സമീപത്തെ കായലിൽ നിന്ന് കണ്ടെത്തി.

കോമളപുരം കന്യാക്കൽ പുതുവൽ വീട്ടിൽ ബാബു (55) വിന്റെ മൃതദേഹമാണ് ബുധനാഴ്ച രാവിലെ 10.30-ഓടെ മത്സ്യത്തൊഴിലാളികൾ കായലിൽ കണ്ടത്. വിവരം ലഭിച്ചതിനെ തുടർന്ന് അഗ്നിരക്ഷാസേനയും പോലീസും ചേർന്ന് മൃതദേഹം കരയിലെത്തിച്ചു.

ചൊവ്വാഴ്ച രാവിലെ 9.30-ഓടെയാണ് ബാബുവിനെ കാണാതായത്. കായലിൽ ഉപേക്ഷിക്കപ്പെട്ട നിലയിൽ വള്ളവും കക്കവാരൽ വലയും കണ്ടെത്തിയതോടെയാണ് നാട്ടുകാർ അഗ്നിരക്ഷാസേനയെ വിവരം അറിയിച്ചത്.

തുടർന്ന് ആലപ്പുഴയിലും കോട്ടയത്തുനിന്നും എത്തിയ ദുരന്തനിവാരണ സംഘങ്ങളുടെ നേതൃത്വത്തിൽ മണിക്കൂറുകളോളം വ്യാപകമായ തിരച്ചിൽ നടത്തിയെങ്കിലും ബാബുവിനെ കണ്ടെത്താനായിരുന്നില്ല. ഒടുവിൽ പിറ്റേന്ന് രാവിലെ പാതിരാമണലിന് സമീപത്ത് മൃതദേഹം കണ്ടെത്തുകയായിരുന്നു.

തുടർനടപടികൾക്ക് ശേഷം മൃതദേഹം വണ്ടാനം മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകി.

ബാബുവിന്റെ അപ്രതീക്ഷിത വേർപാട് കുടുംബത്തെയും സഹപ്രവർത്തകരെയും നാട്ടുകാരെയും ദുഃഖത്തിലാഴ്ത്തി.